„Стиховите во оваа книга се стихови на преминот. Од град во шума, од остров во море, од сурово во нежно и од нежно во сурово, од приказна во минијатура, од век во друг век, од едно тисуштолетие во друга тишина. Стиховите во оваа книга го тераат човека и тој да пишува.“ ‒ Ѓоко Здравески
„Еве едно освежување во преводната литература на македонски јазик што читателот го остава без здив. „Каква полза има човек од тоа едно утро да се разбуди од оваа страна на новиот милениум“ е книга во која ќе се наиде на бес, на побуна предводена од некој современ Одисеј кој талка по некоја современа космичка тапија, книга, во која преку фасцинантна игра на зборовите и световите наведува на размислување за непознатото, недопирливото, размислување за светот на поетот и светот со кој тој нѐ запознава, поетски илуминации вообличени во еден лирски тон кој вниманието ни го насочува кон оригиналната лична поетска стапалка на Ким Симонсен. На висок поетичен фон, често на духовит начин на пеење, читателот е воден кон нови наврати на своите интелектуални, филозофски и други уверувања. Есенцијата на животот и мудроста, поетот најчесто ги обликува во оригинални компарации и метафори коишто често преминуваат во чиста алегорија. Стиховите од оваа книга широко го зафаќаат битот на времето и траењето. Со емоционална згуснатот и метафизичка промисленост поетот создава посебна атмосфера која на читателот му создава чувство на храброст во трагање по вечните вистини. Тоа е поетот Ким Симонсен. Но и преведувачот Јулијана Величковска, која високопрофесионално го преведе ова дело.“ ‒ Славе Ѓорѓо Димоски
